យោងតាមសមាគមផលិតកម្មនៃទ្វីបអឺរ៉ុប បានឲ្យដឹងនៅថ្ងៃទី២៧ ខែឧសភានេះថា ការលក់រថយន្តដែលផលិតដោយក្រុមហ៊ុន Tesla របស់មហាសេដ្ឋី Elon Musk បានធ្លាក់ចុះជាងពាក់កណ្តាល នៅក្នុងខែមេសា ស្របពេលក្រុមហ៊ុនផលិតរថយន្តអគ្គិសនីរបស់ចិន ហាក់បានមើលឃើញពីការកើនឡើងនៃការលក់របស់ខ្លួនយ៉ាងខ្លាំង នៅក្នុងតំបន់នេះ។ នេះបើតាមការចុះផ្សាយពីសារព័ត៌មាន AFP ។
នៅពេលដែលការរលក់រថយន្តអគ្គិសនីបានកើនឡើងជារួម នៅក្នុងប្រទេសចំនួន ២៧ នៃសហភាពអឺរ៉ុប (EU) ប៉ុន្តែការលក់របស់ក្រុមហ៊ុន Tesla បែរជាបានធ្លាក់ចុះយ៉ាងខ្លាំងទៅវិញ ក៏ដោយសារតែនាយកប្រតិបត្តិក្រុមហ៊ុន លោក Elon Musk ហាក់បានទទួលការរិះគន់ជាសាធារណ:នៅក្នុងរយ:ពេលចុងក្រោយនេះ ជុំវិញសកម្មភាពពាក់ព័ន្ធទៅនឹងផ្នែកនយោបាយ ជាមួយប្រធានាធិតីអាមេរិក លោក ដូណាល់ ត្រាំ។
បើតាមសមាគមក្រុមហ៊ុនផលិតរថយន្តអឺរ៉ុប (ACEA) បានិយាយថា ការលក់រថយន្តរបស់ Tesla នៅក្នុងខែមេសា បានធ្លាក់ចុះមកនៅត្រឹមតែ ៥ ៤៧៥ គ្រឿងប៉ុណ្ណោះ ពោលគឺធ្លាក់ចុះ ៥២,៦% បើធៀបទៅនឹងខែដូចគ្នា កាលពីឆ្នាំមុន។
ទន្ទឹមនឹងនេះ នៅក្នុងរយ:ពេល ៤ខែដំបូងនៃឆ្នាំ២០២៥ ការលក់របស់ Tesla បានធ្លាក់ចុះអស់ ៤៦,១% មកនៅត្រឹមចំនួន ៤១ ៦៧៧ គ្រឿង បើធៀបទៅនឹងរយ:ពេលដូចគ្នា កាលពីឆ្នាំមុន។
ជម្រាបជូនផងដែរថា ដោយធ្លាប់តែជាក្រុមហ៊ុនលក់រថយន្តអគ្គិសនីនាំមុខគេនៅអឺរ៉ុប ប៉ុន្តែគិតនៅក្នុងខែមេសាកន្លងទៅ Tesla បានបាត់បង់តំណែងរបស់ខ្លួន ទៅឲ្យក្រុមហ៊ុនដៃគូប្រជែង រួចមាន Volkswagen, BMW, Renault និងក្រុមហ៊ុនផលិតរថយន្តខ្នាតយក្សរបស់ចិន BYD ជាដើម។ នេះបើយោងតាមទិន្នន័យពីក្រុមហ៊ុនប្រឹក្សា JATO Dynamics ៕